Azərbaycan ilə Çin arasındakı tarixi əlaqələr qədim İpək Yolu dövründən bəri mövcuddur və son illərdə bu münasibətlər daha strateji bir səviyyəyə yüksəlmişdir. İki ölkə arasındakı ticari-iqtisadi əlaqələr genişlənərək hər iki tərəfə böyük imkanlar açır. Azərbaycan Prezidenti İlham Əliyevin və Çin lideri Si Cinpinin səyləri və şəxsi münasibətləri bu əlaqələrin yüksək səviyyəyə çatmasına böyük töhfə vermişdir.Son illərdə iki ölkə arasında ticarət həcmi əhəmiyyətli dərəcədə artmışdır. 2023-cü ildə ticarət dövriyyəsi 3,1 milyard dollara çatmışdır. Çin, Azərbaycanın əsas ticarət tərəfdaşlarından biridir və hər iki ölkə arasında səmərəli investisiya əməkdaşlığı davam edir. Azərbaycanın həyata keçirdiyi nəqliyyat-kommunikasiya layihələri, ölkənin Çinin “Bir kəmər, bir yol” təşəbbüsündə mühüm rol oynamasına səbəb olmuşdur. Bu layihə üzrə yükdaşımalar iqtisadi səmərəlilik və təhlükəsizlik baxımından əhəmiyyətlidir.Bundan əlavə, elm, texnologiya, İKT, rəqəmsallıq, eləcə də mədəni-humanitar sahələrdə əməkdaşlığın genişlənməsi gözlənilir. İki ölkə arasındakı münasibətlər strateji səviyyəyə yüksəlmiş və müxtəlif sahələrdə davamlı inkişaf etməkdədir.
