Ekologiya və Təbii Sərvətlər Nazirliyi (ETSN) hava şəraiti ilə bağlı əhaliyə xəbərdarlıq edib. Nazirliyin mətbuat katibi İradə İbrahimovanın bildirdiyinə görə, bu gün və sabah ölkənin bəzi bölgələrində leysan yağışlar yağacaq və bəzi çaylarda sel hadisələri baş verəcək.
Hidrometeoroloqların verdiyi xəbərdarlıqlara əsasən, sel-daşqın ehtimalı yüksəkdir və çay vadilərində və onlara yaxın ərazilərdə dayanmağın təhlükəli olduğu bildirilib. İbrahimova, insanların bəzən sel hadisələrinin ciddi fəsadlarının fərqinə varmadığını və bu xəbərdarlıqlara əməl etmədiklərini qeyd edib.
Nazirlik sözçüsü, hava ilə bağlı xəbərdarlıqlara ciddi yanaşmağın vacibliyini vurğulayıb və bu xəbərdarlıqların fəsadlardan qorunmaq məqsədi ilə verildiyini bildirib. İbrahimova, vətəndaşların hava məlumatlarını mütəmadi izləmələrini tövsiyə edib və sinoptiklər tərəfindən ictimaiyyətə yenilənmiş məlumatların təqdim olunacağını qeyd edib.
