Bu il iyulun 1-nə qədər Dövlət Neft Fondunun (ARDNF) aktivləri 3,4 % artaraq 58 milyard 000,6 milyon ABŞ dollarına çatıb. Bu ilin ilk altı ayında ARDNF-in büdcə gəlirləri 9 254,9 milyon manat, büdcə xərcləri isə 6 414,4 milyon manat təşkil edib.
Neft və qaz sazişlərindən gələn gəlirlər 6 milyard 436,5 milyon manat olub, mənfəət neftinin və qazın satışından gəlirlər 5 milyard 657 milyon manat təşkil edib. Fond valyuta vəsaitlərinin idarə olunmasından 2 milyard 818,4 milyon manat gəlir əldə edib.
ARDNF, 2024-cü il büdcəsinin icrası çərçivəsində 6 milyard 390,5 milyon manat dövlət büdcəsinə transfer edib və bir neçə dövlət proqramını maliyyələşdirib. Valyuta məzənnələrinin dəyişməsindən yaranan fərq isə 441,5 milyon manat olub.
Fondun aktivlərinin idarə edilməsindən əldə edilən gəlirlərdə əsas töhfə səhm investisiyalarından gəlib. İnkişaf etmiş ölkələrin iqtisadiyyatlarındakı yuxarı faiz dərəcələri və aşağı işsizlik dərəcələri, süni intellekt texnologiyalarında irəliləyişlər səhm bazarlarında yüksək gəlirlilik yaradıb. Maliyyə bazarlarında faiz dərəcələri ilə bağlı qeyri-müəyyənlik səngiməkdədir və növbəti rüblərdə uçot dərəcələrinin aşağı düşməsi gözlənilir.
